Ўзбекистон 7 ойда қанча цемент импорт қилгани маълум бўлди
Цемент импорти ўтган йил билан солиштирилганда 421 минг тоннага камайган
2022 йилнинг январь-июль ойларида Ўзбекистонга қиймати 52,5 миллион долларга тенг бўлган 1,3 миллион тонна цемент импорт қилинган. Бу ҳақда Давлат статистика қўмитаси хабар берди.
Қайд этилишича, цемент импорти ҳажми ўтган йилнинг мос даври билан солиштирилганда 421 минг тоннага камайган.
2022 йилнинг 7 ойида ойида Ўзбекистон асосан Тожикистон (533 минг тонна), Қирғизистон (385 минг тонна) ҳамда Қозоғистондан (353 минг тонна) цемент импорт қилган. Шунингдек, қуйидаги давлатлардан ҳам цемент импорти амалга оширилган:
- Туркманистон – 11,5 минг тонна;
- Эрон – 6,7 минг тонна;
- Хитой – 1,4 минг тонна;
- Россия – 782 тонна.
Эслатиб ўтамиз, Ўзбекистон 2021 йилда хориждан 2,7 миллион тонна цемент сотиб олганди. 2022 йил бошида эса Алишер Усмонов таъсисчилигидаги «USM» холдингига тегишли компания «Оҳангаронцемент»нинг 98,6 фоизини сотиб олгани маълум бўлган эди.
