Шавкат Мирзиёев «Ўзбекистонда хизмат кўрсатган тадбиркор» унвонини таъсис этишни таклиф қилди
У Янги Ўзбекистон пойдеворини яратишга энг катта ҳисса қўшиб келаётган заҳматкаш тадбиркорларга берилади
Шавкат Мирзиёев тадбиркорлар билан ўтказилаётган очиқ мулоқотида янги фахрий унвонни таъсис этиш таклифини билдирди, деб хабар беради Президент матбуот котиби.
«Бизда қурувчи, маданият, таълим каби соҳа вакиллари учун фахрий унвонлар мавжуд. Лекин Янги Ўзбекистон пойдеворини яратишга энг катта ҳисса қўшиб келаётган заҳматкаш тадбиркорларнинг эътибордан четда қолгани адолатдан эмас.
Шу боис, кўп иш ўринлари яратган, бизнеснинг янги йўналишларини йўлга қўйган, ўз соҳасида инновация ва ислоҳотлар қилган ва эл-юрт орасида обрў топган бизнес вакилларини муносиб эътироф этиш учун ‘Ўзбекистонда хизмат кўрсатган тадбиркорʼ фахрий унвонини таъсис этишни таклиф қиламан», — дейди Президент очиқ мулоқотда.
Аввалроқ Ўзбекистонда тадбиркорларга нисбатан янги жавобгарлик жорий этишга 3 йиллик мораторий эълон қилиниши, мамлакатда 2023 йил 1 январдан ҚҚС 12 фоизга туширилиши тўғрисида хабар берилганди.
