Қозоғистон президенти Қосим-Жўмарт Тўқаев ядровий синовлар хавфи ҳақида гапирди. Бу ҳақда у ўзининг Twitter’даги саҳифасида маълум қилди.

Тўқаев мамлакат ядровий хавфсизлик тамойилларига доимо содиқ қолишини айтган.

«Бугун Халқаро ядровий синовларга қарши кураш куни. Бу инсоният учун катта аҳамиятга эга. Ядро портлашлари қозоқ заминига жуда катта зарар етказган. Бундай фожиа бошқа такрорланмаслиги керак. Мамлакатимиз доимо ядровий хавфсизлик тамойилларига содиқ қолади», — деган у.

Ядро уруши хавфи ҳақидаги мунозаралар Украинада уруш бошланганидан бери кучайган. Қозоғистон июнь ойида ядровий қуролдан воз кечишга чақирган.

Маълумот ўрнида, Қозоғистон ташаббуси билан БМТ Бош Ассамблеяси томонидан 29 август – Халқаро Ядро синовларига қарши кураш куни деб эълон қилинган.

Аввалроқ ядро урушидан омон қолиши мумкин бўлган давлатлар айтилганди. Шунингдек, АҚШ қандай ҳолатда ядро қуролидан фойдаланиши маълум қилинган.