Украинадаги урушнинг кейинги олти ойда ривожланиши бўйича беш хил сценарийси илгари сурилди. Бу ҳақда «The Guardian» хабар берди.

Биринчи сценарий бўйича уруш яна бир йилга чўзилиб кетади, бироқ у энди шиддатли бўлмайди. Иккинчи сценарийда, Украина самарали ҳужум қилиш учун маблағсиз қолади. Учинчи мумкин бўлган вариантга кўра, Россия олдинга силжийди, аммо унинг мақсади босиб олган ҳудудларни ушлаб туриш бўлади.

«Салқин об-ҳаво яқинлашар экан, Россия қўлга киритган нарсаларини мустаҳкамлашга эътибор қаратиши мумкин», дейилади хабарда.

Тўртинчи сценарий қишнинг янги қочқинлар инқирозини келтириб чиқаришини кўрсатади.

«Гуманитар ташкилот вакилларидан бири қишда миграциянинг янги тўлқини бўлишини, эҳтимол, 2 миллионгача одам Польша чегарасини кесиб ўтишини башорат қилганди», таъкидланган хабарда.

Бешинчи сценарийга кўра, Ғарб Украинадаги воқеаларнинг янада ривожланиши тўғрисида қарор қабул қилиши керак. У Украина ғалаба қозонишини хоҳлайдими ёки шунчаки мамлакатни ушлаб туришни.

Аввалроқ Путин Украинадаги урушнинг якуний мақсадини айтганди. Шунингдек, АҚШ ва иттифоқчилари Украинадаги урушнинг узоқ кечишига тайёрланаётганди.