Тошкентда 38 ёшли эркак 503 минг сўмлик озиқ-овқат маҳсулотларини ўғирлади — видео
Орадан уч кун ўтгач, у касаллик туфайли вафот этган
Тошкент шаҳар ИИББ Яшнобод туманидаги супермаркетда ўғирлик содир этган шахс видеоси юзасидан маълумот берди.
Ижтимоий тармоқларда бир фуқаро дўконда ўғрилик содир этаётгани акс этган видео тарқалди. Видеода эркак колбоса, сариёғ ва бошқа маҳсулотларни кўйлагининг ичига яширгани тасвирланган.
Идоранинг маълум қилишича, 26 август куни Яшнобод туманида жойлашган дўконларнинг бирида 38 ёшли А.Р. жами 503 минг сўмлик маҳсулотларни талон-торож қилиб, воқеа жойидан яширинган.
Ҳолат юзасидан ўтказилган текширув жараёнида А.Р. 29 август куни сурункали касаллик туфайли вафот этган. Таъкидланишича, шу сабабли иш ҳужжатлари юритувдан тугатилади.
Бундан олдин Тошкентда меҳмонхона сейфидан пул ўғирлаган икки эркак ушлангани, Жиззахда 2 эркак ўзганинг уйига кириб, 20 минг доллар ва 60 миллион сўм пулни ўғирлаб кетгани тўғрисида хабар берилганди.
