Хитой Тайванни қанчалик кўп ғазаблантирса, орол шунчалик хотиржам бўлиши керак, аммо вазминлик Пекинга қарши турмасликни англатмайди. Бу ҳақда Тайван президенти Цай Инвэньга таяниб, «Reuters» хабар берди.

Тайван бўғозидаги Пенгу оролларида жойлашган йирик ҳаво ва денгиз базасига ташриф буюрган президент Хитойнинг ҳарбий машғулоти ва қўрқитишларини қоралаган.

«Ҳаммага шуни айтмоқчиманки, душман қанча кўп ғазаблантирса, биз шунчалик хотиржам бўлишимиз керак. Биз низоларни қўзғатмаймиз ва ўзимизни ушлаб турамиз, аммо бу қаршилик қилмаймиз дегани эмас.

Мен Миллий Мудофаа вазирлигига хавфсизликни ҳимоя қилиш учун зарур ва қатъий қарши чораларни ўз вақтида кўришни буюрдим», — дея қўшимча қилган у.

Ўз навбатида, президентнинг мазкур баёнотидан кейин Тайван биринчи марта Хитойнинг дронини ўққа тутган. Дрон Эрдан оролига яқинлашган ва тайванлик ҳарбийлар уни нишонга олган. Кейин дрон орқага бурилиб, Хитойнинг қирғоқ бўйидаги Фуцзянь провинциясида жойлашган Сямэнь шаҳри томон йўл олган.

Аввалроқ Тайван президенти давлат ўзини ҳимоя қилишини айтганди. Шунингдек, Хитой АҚШдан Тайван билан алоқаларни тўхтатишни талаб қилганди.