Тошкент шаҳри Яккасарой тумани 1 сентябрь куни технопарк ҳудудидаги ишлаб чиқариш цехида юзага келган ёнғин юзасидан расмий маълумот берилди. Бу ҳақда Фавқулодда вазиятлар вазирлиги ахборот хизмати хабар берди.

Маълум қилинишича, Қўшбеги даҳасида 1 сентябрь куни соат 16:26 да Яккасарой тумани Қўшбеги дахасида жойлашган Яккасарой технопарк ҳудудидаги ишлаб чиқариш цехининг том ва ички қисмида дастлабки маълумотларга кўра тахминан 800-1000 квадрат/метр майдонида ёнғин содир бўлган.

Шунингдек, ёнғин-қутқарув экипажлари соат 16:31 да ҳодиса жойига етиб борган ва соат 17:29 да ёнғин қуршаб олинган. Айни вақтда ёнғинни бартараф этиш ишлари амалга оширилмоқда. Вазият тўлиқ назоратга олинган.

Ёнғин жойига Фавқулодда вазиятлар вазирлиги раҳбарияти, шаҳар Фавқулодда вазиятлар бошқармаси ва туман Фавқулодда вазиятлар бўлими раҳбар ходимлари етиб борган. Таъкидланишича, ҳозирда ёнғин оқибатида фуқароларни жароҳати олиш ва ҳалок бўлиш холатлари тўғрисида хабар келиб тушмаган.

Кейинроқ ФВВ ҳолат юзасидан қўшимча маълумот берди. Унга кўра, ёнғин оқибатида фуқароларни тан жароҳати олиш ва ҳалок бўлиш холатлари тўғрисида хабар келиб тушмаган. Ҳозирда ёнғиннинг келиб чиқиш сабаби ва келтирилган моддий зарар миқдори аниқланмоқда.

Эслатиб ўтамиз, Тошкент шаҳридаги Тузел 2-даҳасида 18 август куни соат 01:57 да кўп қаватли уйнинг 1-қаватидаги атир-упа савдо дўконининг 35 квадрат метр ва унига туташ бўлган иккита МЧЖнинг 15 квадрат/метр майдонда офис учун мўлжалланган хона жиҳозлари ёниб зарарланганди. Ўтказилган текширув жараёнида ёнғин 1981 йилда туғилган Н.Ж. томонидан содир этилгани аниқланган.