Қашқадарёда эркак 4-қаватдан йиқилиб тушиб, ҳалок бўлди
У деразадан дарахтга сакраб, қочмоқчи бўлган
Қашқадарё вилояти Қарши шаҳрида жойлашган 2-сонли ётоқхонада 3 сентябрь куни 35 ёшли эркак 4-қаватидан тушиб кетиб ҳалок бўлди. Бу ҳақда «Nasafnews» хабар берди.
Маълум қилинишича, ётоқхонанинг 4-қаватидаги уйлардан бирида яшовчи 1987 йилда туғилган эркак М.Н. қўшнилари билан жанжаллашиб қолган. Қўшнилар унга тиғли буюмлар билан жароҳат етказган. Фуқаро эса ўзини ҳимоя қилиш мақсадида уйига кириб, устидан қулфлаб деразадан дарахтга сакрамоқчи бўлган вақтида қулаб тушиб воқеа жойида ҳалок бўлган.
Шунингдек, ётоқхонанинг биринчи қаватида маҳалла идораси ва ҳудуд профилактика инспектори хонаси жойлашган. Ҳозирда марҳум яшаган хонадон ҳуқуқни муҳофаза қилувчи органлар томонидан муҳрланган. Ҳудуд профилактика инспектори воқеа юзасидан ҳозирда прокуратура органлари томонидан тергов олиб борилаётганини маълум қилган.
Эслатиб ўтамиз, аввалроқ Тошкентда 1,5 яшар бола 11-қаватдан тушиб кетиб, ҳалок бўлгани ҳақида хабар берилганди. Шунингдек, Россияда ўзбекистонлик 6 ёшли бола 4-қаватдан тушиб кетганди.
