Ташқи меҳнат миграцияси агентлиги Россияга ишга кетмоқчи бўлганларни огоҳлантирди
Бунга лицензиясиз ташкилотлар фуқароларни хорижга юбораётганига оид мурожаатлар сабаб бўлган
Ташқи меҳнат миграцияси агентлиги фуқароларни Россияга ишга жўнатиш билан шуғулланаётган ноқонуний ташкилотларга алданиб қолмаслик ҳақида огоҳлантирди.
Қайд этилишича, ижтимоий тармоқларда «Ресурс Капитал» ташкилоти томонидан фуқаролар Россияга ишга жўнатилиши ҳақида эълонлар берилмоқда.
«Фуқароларни хорижга ишга жўнатиш Ўзбекистон қонунчилигига мувофиқ, лицензияли фаолият ҳисобланади», — дейилади хабарда.
«Ресурс Капитал» ташкилоти эса фуқароларни хорижга ишга жўнатиш учун лицензия олмаган ва Ташқи меҳнат миграцияси агентлигига фуқаролардан ушбу ташкилот устидан кўплаб шикоятлар келмоқда. Шу сабабли агентлик «Ресурс Капитал» ташкилоти фаолияти ноқонунийлигини эслатиб ўтган.
«Шу билан бирга, ижтимоий тармоқ админларидан бу хизмат билан ноқонуний шуғулланаётган ташкилотлар тўғрисидаги маълумотларни эълон қилишда қонунчиликка риоя қилишни, фуқаролардан эса фирибгарлик қурбонига айланиб қолмасликни сўраймиз», — дея таъкидланади хабарда.
Аввалроқ Қозоғистонда мажбурий меҳнатда ушлаб турилган Ўзбекистон фуқароларига ёрдам кўрсатилгани,
Москвада 15 нафар ўзбекистонликнинг иш ҳақи қисман ундириб берилгани, Россияда ўзбекистонлик мигрантларни мажбурий меҳнатга жалб қилган иш берувчи ҳибсга олингани тўғрисида хабар берилганди.
