Ўзбекистон Тўғридан-тўғри инвестициялар жамғармаси МЧЖга айлантирилди
«Ўзбекистон Республикасининг Тўғридан-тўғри инвестициялар жамғармаси фаолиятини такомиллаштириш чора-тадбирлари тўғрисида»ги Президент фармони қабул қилинди. Бу ҳақда Telegram’даги «Ҳуқуқий ахборот» канали хабар берди.

Фармонга мувофиқ «Тўғридан-тўғри инвестициялар жамғармасининг бошқарув компанияси» акциядорлик жамияти устав капитали 100 миллион АҚШ долларига тенг «Ўзбекистон Республикасининг Тўғридан-тўғри инвестициялар жамғармаси» МЧЖ шаклидаги инвестиция компанияси сифатида қайта ташкил қилинди.
Қайд этилишича, инвестиция компаниясининг устав капитали 1 миллиард долларга етказилади. Инвестициялар ва ташқи савдо вазири Инвестиция компаниясининг Кузатув кенгаши раиси ҳисобланади.
Инвестиция компанияси инвестицияларни қуйидаги усуллар билан жалб қилади:
- кредит (қарз) олиш ва Инвестиция компаниясининг устав капиталига инвесторларнинг пул маблағларини жалб қилиш;
- юридик шахсларни ташкил этиш ёки уларнинг устав фондларида (устав капиталида), шу жумладан мол-мулк сотиб олиш йўли билан иштирок этиш;
- йирик институционал ва стратегик инвесторлар билан ҳамкорлик ўрнатиш, шу жумладан нуфузли халқаро молия марказларининг юрисдикцияларидан фойдаланиш.
Эслатиб ўтамиз, 2021 йилнинг апрелида Отабек Назиров Инвестициялар ва ташқи савдо вазирининг маслаҳатчиси – Тўғридан-тўғри инвестициялар жамғармаси Бош директори этиб тайинланганди.