Тошкент шаҳар Яшнобод тумани Ўш кўчасида жойлашган кўп қаватли турар-жой қурилишига 5 сентябрь куни сифатсиз ғишт олиб келинди. Ҳолатга Қурилиш вазирлиги ҳолат юзасидан муносабат билдирди.

Қайд этилишича, Яшнобод тумани Ўш кўчасида жойлашган кўп қаватли турар-жой биноларининг қурилиши Вазирлар Маҳкамасининг 20 апрелдаги 200-сонли қарори бандларига зид равишда шаҳар Қурилиш соҳасида ҳудудий назорат инспекцияни хабардор қилмаган ҳолда амалга оширилган. Ҳолат юзасидан инспекция томонидан Маъмурий жавобгарлик тўғрисидаги кодекснинг 99-моддаси (Шаҳарсозлик тўғрисидаги қонунчиликни бузиш) 7-қисми билан чора кўрилган.

Шунингдек, мазкур қурилиш объектида август ойи охирларида «Оҳангарон соф ғиштлари» масъулияти чекланган жамияти томонидан олиб келинган ғишт маҳсулоти сифатсиз эканлиги аниқланган. Қурилиш ишларига яроқсиз бўлганлиги учун ғиштдан фойдаланилмаган.

Ҳозирда шаҳар Қурилиш соҳасида ҳудудий назорат инспекцияси томонидан «Оҳангарон соф ғиштлари» масъулияти чекланган жамияти корхонасига нисбатан чора кўрилаётганлиги маълум қилинган.

Эслатиб ўтамиз, аввалроқ Ўзбекистоннинг айрим ҳудудларидаги қурилиш объектларида сифатсиз туника листлар ишлатилаётгани аниқлангани ҳақида хабар берилганди. Маълум қилинишича, Россиядан келтирилган 3 турдаги намуналарнинг қалинлик кўрсаткичлари амалдаги туника листларникидан сифатсиз экани аниқланган.