Йўл ҳаракати хавфсизлиги хизмати базаси 31 августдан бери ишламаётгани ҳақида хабарлар тарқалди. «Bugun.uz» ҳолатга аниқлик киритиш мақсадида ЙҲХХ матбуот котиби билан боғланди.

Давлат йўл ҳаракати хавфсизлиги хизмати 31 август куни «Автомототранспорт ҳисоби» ва «Ҳайдовчилик гувоҳномаси» тизимларида модернизация ва техник-профилактик ишлари амалга ошрилаётгани сабабли, ушбу тизимлар фаолияти 5 сентябрь куни соат 07:00га қадар тўхтатганди.

8 сентябрь куни ижтимоий тармоқларда «My.gov.uz» орқали автомототранспорт воситалари билан боғлиқ хизматлардан фойдаланишда узилишлар юзага келаётгани тўғрисида хабарлар тарқалди. ЙҲХХ матбуот котибининг «Bugun.uz»га маълум қилишича, «тизимда интеграция ишлари олиб борилган, ҳозирда ЙҲХХ сайти орқали хизматлар кўрсатилмоқда».

Аввалроқ ҳам Ўзбекистонда ҳайдовчилик гувоҳномасини янгисига алмаштириш вақтинча тўхтатилган. Хусусан, 2021 йилнинг ноябрида ва 2022 йилнинг 19 мартдан 2 апрель кунигача Ички ишлар вазирлиги Йўл ҳаракати хавфсизлиги бошқармаси электрон тизимида техник-профилактик тадбирлар амалга оширилгани сабаб ҳайдовчилик гувоҳномасини алмаштириш хизмати вақтинча кўрсатилмаганди.

Шу йилнинг июль ойидан бошлаб эса Ўзбекистонда эски намунадаги ҳайдовчилик гувоҳномаларини янгисига алмаштиришни тўла рақамлаштириш ва янги гувоҳномаларни почта орқали етказиб беришни йўлга қўйиш масаласи кўриб чиқилаётгани тўғрисида хабар берилганди.