Москва шаҳридаги «Ломоносовский» муниципал округи депутатлари Россия президенти Владимир Путиндан истеъфога чиқишни сўради.

Мурожаатда ҳокимият алмашинуви мамлакат тараққиётида ҳал қилувчи рол ўйнаши келтириб ўтилган.

«Иккинчи муддатдан кейин Путин учун ҳамма нарса нотўғри кетди: ЯИМ икки баравар кўпаймади, энг кам иш ҳақи эълон қилинган кўрсаткичга мос ошмади, ақлли ва меҳнаткаш одамлар Россияни оммавий равишда тарк этди, ваъда қилинган барқарорлик кўринмаяпти» дейилади мурожаатда.

Депутатларнинг қўшимча қилишича, Россия ҳукуматининг риторикаси «тоқатсизлик ва тажовузкорлик» билан тўлиб-тошган, шу сабабли мамлакатда «қўрқув ва нафрат» пайдо бўла бошлаган.

Уларнинг фикрича, Путиннинг қарашлари ва унинг бошқарув модели эскирган ва Россиянинг ривожланишига, инсон салоҳиятига тўсқинлик қилмоқда. Шу муносабат билан улар Россия президентидан «ўз лавозимидан озод этилишини» сўраган.

Аввалроқ Украина ТИВ Путинни жазолаш учун петицияни имзолашга чақирганди. Пентагон Путиннинг янги стратегияси ҳақида маълумот берганди.