Тошкент вилоятининг Олмалиқ шаҳрида заргарлик буюмлари билан савдо қилувчи дўконга ўғирликка тушган эркак ушланди, деб хабар беради Миллий гвардия ахборот хизмати.

Маълум қилинишича, 2 сентябрь куни соат 10:48 да шаҳарнинг «Қўриқлаш» бўлимига қўриқловга олинган заргарлик буюмлари дўконидан «ташвиш» хабари келиб тушган.

Тезкорлик билан воқеа жойига етиб келган ходимлар томонидан мазкур дўкондан заргарлик буюмларини ғайриқонуний тарзда олиб чиқишга уринаётган номаълум шахс қўлга олинган.

Дастлабки текширув ишлари натижасида фуқаро 35 ёшли Т.А. экани аниқланган. Ҳозирда мазкур ҳолат бўйича суриштирув ишлари Олмалиқ шаҳар ИИБ томонидан олиб борилмоқда.

Эслатиб ўтамиз, аввалроқ Фарғонадаги мебель ясаш устахонасига ўғирликка тушган эркак қўлга олингани ҳақида хабар берилганди. Шунингдек, Тошкентда меҳмонхона сейфидан пул ўғирлаган икки эркак ушлангани, Жиззахда 2 эркак ўзганинг уйига кириб, 20 минг доллар ва 60 миллион сўм пулни ўғирлаб кетгани тўғрисида хабар берилганди.