Тошкентда маст аёл ЙПХ ходимига қаршилик кўрсатди — видео
«Kia» ҳайдаб кетаётган аёл ходимнинг тўхташ ишорасига бўйсунмаган
Тошкентда маст ҳолатда автомобиль бошқарган аёл ЙПХ ходимларининг қонуний талабларини бажармай, уларга қаршилик кўрсатди. Бу ҳақда «Zo‘r TV телеканали орқали эфирга узатилган лавҳада маълум қилинди.
Қайд этилишича, пойтахтнинг Паркент кўчада хизмат олиб бораётган ЙПХ ходими «Kia» транспорт воситасига тўхташ ишорасини кўрсатган. Бироқ ҳайдовчи ходимнинг қонуний талабларини бажармай, ҳаракатланишни давом эттирган. ЙПХ ходими патруль машинасида аёл бошқарувидаги автомобилни кузатиб борган.
Аёл машинасини тўхтатганида, ортидан етиб келган ЙПХ ходимига қаршилик кўрсатиб, унинг кийимларини йиртиб ташлаган, лаб қисмига жароҳат етказган.
Ҳайдовчи тиббий кўрикдан ўтказилганида, унинг маст ҳолатда экани тасдиқланган.
Ҳолат юзасидан ўрганиш ишлари олиб борилмоқда ва тегишли ҳужжатлар расмийлаштирилган.
Аввалроқ Қашқадарё вилояти Қарши шаҳрида «Nexia» автомобили салонидан оёқларини чиқариб ҳаракатланган маст аёл жаримага тортилганди.
