Қашқадарёда назоратсиз қолдирилган 3 ёшли боғча боласини поезд уриб кетди — видео
Вилоят ХТБ ҳолат юзасидан суриштирув ишларини олиб бормоқда
Қашқадарё Мактабгача таълим бошқармаси 3 ёшли болани «Афросиёб» тезюрар поезди уриб кетгани айтилган хабарларга муносбат билдирди.
Ижтимоий тармоқларда Қашқадарёда боғча тарбияланувчиси бўлган 3 ёшли болани «Афросиёб» тезюрар поезди уриб кетгани ҳақидаги хабар ва ҳолат акс этган видеолар тарқалди. Маълумотларга кўра, воқеа 9 сентябрь куни соат 15:33 да Косон тумани «Қўнғиртоғ» МФЙ, Каманди қишлоғида Қарши—Мароқанд темир йўл йўналишида қатновчи «Афросиёб» юқори тезюрар электропоезди билан содир бўлган.
Назоратсиз қолдирилган бола боғча ҳудудидан чиқиб, яқин орадаги темир йўлга бориб қолган. Поезд йўлига чиқволиб кетаётганида «Афросиёб» юқори тезюрар электропоезди уни уриб кетган. Олинган жароҳатлар оқибатида бола вафот этган.
«Ҳолат юзасидан суриштирув ишлари олиб борилмоқда, қўшимча маълумот тақдим этилади», — дейилади вилоят ХТБ муносабатида.
Аввалроқ Фарғонада 4 ёшли боғча боласи сувга чўкиб кетгани юзасидан жиноят иши қўзғатилгани, Навоийдаги боғчада болалар оммавий заҳарлангани тўғрисида хабар берилганди.
