Тайван Ғарб фуқаролари учун визасиз режим жорий қилди
Хорижликлар амал қилиши керак бўлган ягона талаб айтилди
Тайванда уч кунлик карантиндан ўтишни ҳисобга олган ҳолда қатор давлатлар фуқаролари учун визасиз режим жорий қилинди. Бу ҳақда «Reuters» хабар берди.
Маълум қилинишича, мазкур режим 12 сентябрь, душанба кунидан кучга киради. Янгилик АҚШ, Буюк Британия, Австралия, Янги Зеландия, ЕИ мамлакатлари, шунингдек, Тайван дипломатик алоқалар олиб бораётган яна 14 давлат фуқароларига тааллуқлидир.
Улар Тайванга туристик, бизнес, илмий мақсадларда визасиз келиши, шунингдек, қариндошлариникига бориши ёки кўргазмаларда иштирок этиши мумкин бўлади. Оролга етиб келгач, улар уч кунлик карантиндан ўтиши ва яна тўрт кун соғлиғини кузатиши керак.
Аввалроқ АҚШ Тайванга 1,1 млрд долларлик ҳарбий техника сотмоқчилиги ва Тайван Украинага 800 та бомбардимончи дронлар совға қилгани маълум қилинганди.
