«Толибон» томонидан тайинланган Соғлиқни сақлаш вазирлиги Афғонистонда саратон касаллигининг кўпайишидан хавотир билдириб, Кобулда сўнгги беш ойда 10 мингдан ортиқ одам бу хасталикка чалинганини айтди. Бу ҳақда «AVApress» хабар берди.

Вазирлик мамлакатда саратон касаллигига чалинганларнинг аниқ статистикасини келтирмаган.

«Биз даволаниш учун барча стандартлар ва жиҳозлар бўлган яхши шифохоналарга эга бўлишга ҳаракат қилмоқдамиз. Аввало, мавжуд марказларни яхши жиҳозлашга ҳаракат қиляпмиз», — деган вазирлик матбуот котиби Шараф Замон.

Афғонистон шифохонасида онкологик беморларни даволаш бўлимида дори воситалари етишмаётгани айтилмоқда. Бошқа томондан, айримлар Кобулда саратон касаллигининг паст диагностикасидан хавотир билдирмоқда.

«Бизда компютер томографияси йўқ ва беморлар бу амалиётни кўчада қилади.  Уларга касалхонада мавжуд одатий дорилар ва саратон касаллигига тегишли препаратлар берилади. Афсуски, касалликнинг ўзига қарши дори йўқ. Беморлар мавжуд бўлмаган, керакли дориларни ташқаридан сотиб олади», — дейди Саратон касалликларига қарши кураш бўлими раҳбари Забиҳуллоҳ Ҳошимий.

Шифокорлар мамлакатда кимёвий қурол қўлланилиши ва атроф-муҳитнинг ифлосланишини онкологик касалликларнинг кўпайишининг асосий сабабларидан бири деб ҳисобламоқда.

Аввалроқ Афғонистонда аҳоли хавфли касалликка чалинаётгани ва мамлакатда вабога чалинганлар олти мингдан ошгани маълум қилинган.