Фарғонада ўзганинг пластик картасидан 6,5 миллион сўмни ечиб олган шахсга нисбатан жиноят иши қўзғатилди. Бу ҳақда Фарғона вилояти ИИБ ахборот хизмати хабар берди.

Маълум қилинишича, 4 август куни М.С. исмли шахс Telegram орқали фуқаро Ф.З.ни ишончига кириб, унга вояга етмаган фарзанлари бўлса моддий ёрдам берилишини айтган. Бунинг учун гуруҳга пластик карта рақамини юбориши ҳақида ёлғон хабар жўнатиб, тегишли банк томонидан берилган пластик карта хос рақамини кўлга киритган ва карта ҳисобида бўлган жами 6 миллион 582 минг сўм пулларини фирибгарлик йўли билан ечиб олган.

Мазкур ҳолат юзасидан Фарғона тумани ИИБ ҳузуридаги тергов бўлими томонидан Жиноят кодексининг 168-моддаси 2-қисми «в» банди (Фирибгарлик) билан жинояти иши қўзғатилган.

Маълумот учун, юқорида кўрсатилган жиноятни содир этган шахс 5 йилгача озодликдан маҳрум қилиш билан жазоланиши мумкин.

Бундан олдин Бухорода ўзгаларнинг пластик картасидан пулларни ечиб келган талаба фош этилгани, Самарқандда фуқароларнинг пластик карталаридан пулларини ечиб олган йигитга чора кўрилгани ва Telegram’даги гуруҳ маъмурлари карталаридан пул ечиб олган 10-синф ўқувчиси ушлангани хабар қилинган.