Навоийда ота-болани Зарафшон шаҳридаги кон бошқармасига ишга киритиш мақсадида 800 доллар олаётган шахсларга жиноят иши қўзғатилди. Бу ҳақда вилоят Ички ишлар бошқармаси ахборот хизмати хабар берди.

Маълум қилинишича, Зарафшон шаҳрида истиқомат қилаётган А.Д. таниши О.Г. билан тил бириктириб Зарафшон шаҳридаги кон бошқармасига ишга киришни мақсад қилган А.С. ва унинг ўғлини ҳожатини чиқариш ва хизмати эвазига мўмай даромадли бўлишни кўзлаган.

Шунингдек, олдиндан талаб қилинган 800 АҚШ долларини шаҳардаги «Сўғдиёна» кафесида олаётган вақтида жиноят устида қўлга олинган. Мазкур ҳолат юзасидан А.Д. ва О.Г.га нисбатан Жиноят кодексининг тегишли бандлари билан жиноий иш қўзғатилган.

Эслатиб ўтамиз, аввалроқ Навоийда фуқарони гидрометаллургия заводига ишга киритиб қўйишни ваъда қилган аёл ушлангани ҳақида хабар берилганди. Шунингдек, Самарқандда тез ёрдам бўлими мудири фуқародан ишга киритиб қўйиши учун 500 доллар олган вақтида қўлга олинганди.