Тошкент ҳайвонот боғидаги жирафанинг ўлимига нима сабаб бўлгани маълум қилинди
Ҳайвонот боғи бош ветеринари бу борадаги маълумотлар билан бўлишди
Тошкент ҳайвонот боғида 20 август куни 9 ёшли Алатау лақабли жирафа вафот этганди. Ҳайвонот боғининг бош ветеринар шифокори Маҳмуд Кузибаев ҳайвонот боғимизнинг ягона жирафаси вафоти сабаблари ҳақида маълумот берди.
Кузибаевнинг айтишича, ўлимдан кейинги патологоанатомик ва лаборатор текширувлари натижаларига кўра, ҳайвоннинг ўлими провентрикуляр тимпания туфайли юзага келган мия ишемияси туфайли содир бўлган. Тимпания, ўз навбатида, ўн икки бармоқли ичакнинг туғма нуқсони туфайли ҳосил бўлган.
Маълумот учун, Алатау Тошкент ҳайвонот боғига 2016 йилда 3 ёшлигида келтирилган. Унинг яшаши ва тўлақонли озиқланиши учун энг маъқул шароитлар яратилган, шунингдек, барча профилактик ветеринария тадбирлари ҳам ўз вақтида ўтказилган эди.
«Биз жирафимизни жуда соғиняпмиз, унинг ўрни жуда билиняпти…”, — дейди бош ветеринар.
Аввалроқ Қорақалпоғистоннинг Нукус шаҳрида жойлашган хусусий ҳайвонот боғида ҳайвонларнинг аҳволи оғир экани аниқланганди. Шунингдек, Тошкент ҳайвонот боғида аёл қизини айиқлар қафасига ташлаган.
