Тошкент вилоятида қарийб 2 минг тонналик цистернадан сув оқиб чиққанига изоҳ берилди — видео
ФВВга кўра, ушбу цистернадан аҳолини сув билан таъминлашда фойдаланилмаган
Фавқулодда вазиятлар вазирлиги Тошкент вилоятининг Паркент туманида улкан цистернадан сув оқиб чиқаётгани тасвирланган видеога муносабат билдирди.
Ижтимоий тармоқларда цистерна ёриқларидан сув оқаётгани ва остига «Паркент тумани Фавқулодда вазиятлар бўлими 1750 тонналик сув резервуарида ёриқлар ва яроқсиз жойлари аниқланмади деб аҳолини сув билан таъминлашга ишлатиш мумкин деб ёзиб кетипти» дея изоҳ қолдирилган видео тарқалди.
Қайд этилишича, мазкур ҳолат ФВВ томонидан ўрганилганда, резервуар Тошкент вилояти Паркент тумани «Авиасозлар» боғдорчилик, узумчилик ширкатига тегишли экани аниқланган. Ўрганиш давомида мутасаддилар иштирокида ҳудуддаги кичик сиғим аҳоли ичимлик суви учун тўлдирилмасдан фойдаланилаётгани, сиғимда ҳеч қандай ёриқлар мавжуд эмаслиги маълум бўлган.
Ҳолат бўйича 14 сентябрь куни ширкат раҳбари, ишчилари ҳамда ҳудуд профилактика инспектори иштирокида далолатнома тузилган.
Тарқалган хабарда эълон қилинган видео 2021 йил 7 март куни санасига тегишли бўлиб, бу вақтда сиғим қайта таъмирдан чиқарилган. Шу муносабат билан сиғим, текшириб кўриш мақсадида, мутасаддилардан иборат комиссия аъзолари иштирокида 5 дақиқага тоширилган ва ёриқлар йўқлиги маълум бўлган.
Эслатиб ўтамиз, 2020 йилда Тошкент вилояти Паркент туманида сув цистернаси ёрилиб кетиши оқибатида 8 та дала ҳовлига зарар етганди.
