АҚШ президенти Жо Байден Россия президенти Владимир Путинни Украинада ядровий қурол қўлламасликдан огоҳлантирди, деб хабар беради «Daily Mail».

Қайд этилишича, Россия армияси Украинада мағлубиятга учрамоқда. Шу сабабли Путин ядровий қуролдан фойдаланиши мумкинлиги ҳақидаги миш-мишлар тарқалган, экспертлар бу борада турли фикрларни билдирмоқда.

Жо Байден «60 дақиқа» дастурида журналистлар билан мулоқотда Путинни Украинада тактик ядровий қуролни қўлламасликдан огоҳлантирган. Унинг сўзларига кўра, бу «уруш ҳолатини» тубдан ўзгартириб юборади. Жумладан, шу қадар кенг кўламли ўзгарадики, бунақаси охирги марта Иккинчи жаҳон урушида содир бўлган.

«Бу оқибатларни юзага келтиради. Россия бутун тарихи давомида дуч келмаган даража яккаланиб қолади», — дейди Америка етакчиси.

Байден аниқ ҳаракатлар режаси ҳақида гапиришдан бош тортган, бироқ Қўшма Штатлар Россия ташлаган қадамлардан келиб чиқиб ҳаракат қилишини айтган.

Аввалроқ Американинг истеъфодаги бригада генерали Кевин Раян Путин ноиложликдан Украинада ядро қуролидан фойдаланиши мумкинлигини айтганди. Унинг фикрича, Россия президенти радикал чора кўриш учун босим ҳис қилаётган бўлиши мумкин. Украинанинг қарши ҳужуми Кремль раҳбарини «қизил тугма»ни босиши учун триггер вазифасини ўташи мумкин.

Аввалроқ Россия президенти ядро урушида ғолиб бўлиши мумкин эмаслигини маълум қилганди. Шунингдек, олимлар ядро уруши сайёрага қандай таъсир қилишини аниқлаганди.