Навоий вилояти Хатирчи туманида 16 сентябрь куни хонадонларнинг биридан уй эгаси ер ковлаётиб кўмиб юборилган одам скелети топиб олгани айтилди. Вилоят прократураси ҳолат юзасидан расмий муносабат билдирди.

Қайд этилишича, Хатирчи туманида яшовчи фуқаро Р. З. 2022 йилнинг 16 сентябрь куни ҳовлисида жойлашган экин ерини ковлаётган вақтида, одам суягига ўхшаш суяклар чиққанлигини ҳуқуқни муҳофаза қилувчи органларга маълум қилган.

Шунингдек, мазкур ҳолат юзасидан Хатирчи туман прокуратураси томонидан терговга қадар текширув ҳаракатлари олиб борилаётган бўлиб, экспертиза текшируви учун тегишли намуналар олиниб, суд-тиббий ҳамда суд-тиббий криминалистик экспертизалар тайинланган.

Терговга қадар текшириш натижаси бўйича қонуний қарор қабул қилиниши таъминланиши маълум қилинган.

Эслатиб ўтамиз, аввалроқ Намангандан топилган номаълум мавжудот скелетининг қайси ҳайвонга тегишли экани аниқлангани ҳақида хабар берилганди. Хабарга кўра, номаълум ҳайвоннинг скелети бундан 25 миллион йил аввал яшаган динозавр-индрикотерияга тегишли экани аниқланган. Бу мавжудотнинг скелети 13 март куни туманнинг Қоратепа маҳалласидан топилган.