Қирғизистон президенти Садир Жапаров мамлакатнинг жанговар салоҳиятига ишонч билдирди. Бу ҳақда у қирғиз халқига йўллаган мурожаатида маълум қилган.

Унинг сўзларига кўра, мамлакатнинг ўз чегараларини ҳимоя қилиш ҳамда можаролар вақтида вайрон бўлган ва ёқиб юборилган уйларни зудлик билан қайта тиклашга кучи ҳам, маблағи ҳам етади. Давлат раҳбарининг тушунтиришича, бундан икки йил олдин ҳарбийларга аскарий анжомлар етишмаган, бироқ эндиликда армия барча йўналишда қудратини оширган.

«Маълумки, Ўзбекистон билан чегарадаги барча ҳудудлар тартибга солинган ва уларни расмийлаштириш қолган холос. Бугунги кунда фақат Тожикистон билан чегарадош ҳудудлар аниқлаштирилмаган ва муаммо келтириб чиқармоқда», — дейди у.

Жапаров Бишкек чегарадаги вазиятни тинч йўл билан ҳал этиш учун барча саъй-ҳаракатларини ишга солишига ваъда берган.

Эслатиб ўтамиз, 14 сентябр тонгида Боткен вилоятининг Булоқбоши туманида аввалроқ эришилган келишувларни бузган ҳолда чегаранинг жанговар позициясини эгаллаган тожикистонлик чегарачилар аниқланган ва икки мамлакат чегарачилари ўртасида отишма содир бўлган. Қирғизистон томони маълумотларига кўра, 24 киши ҳалок бўлган, юздан ортиқ одам яраланган. Тожикистон қурбонлар сони бўйича расмий рақамларни келтирмаган.