АҚШ суверенитет ҳимояси масаласида Хитойнинг қатъиятига паст баҳо беришни тўхтатиши керак. Хитой Ташқи ишлар вазирлиги Жо Байденнинг Тайванни ҳимоя қилишга тайёр эканини айтган сўзларига муносабат билдирди.

Хитой ТИВнинг расмий вакили Мао Нин мамлакат Вашингтоннинг ҳаракатлари амалга ошса, жавоб кўриш ҳуқуқини ўзида сақлаб қолишини таъкидлаган. Шунингдек, Пекин ҳам Америка етакчисининг сўзларига норозилик билдирган ва аллақачон АҚШ томонига тақдимномасини киритган.

«Америка томонининг баёноти ‘ягона Хитойʼ тамойилини ва учта қўшма Хитой—АҚШ коммуникесининг низомларини, АҚШнинг Тайван мустақиллигини қўллаб-қувватламаслик борасидаги муҳим мажбуриятларини бузади, шунингек, орол мустақиллиги учун чиқиш қилаётган сепаратистик кучларга ёлғон сигнал юбормоқда», — дейди дипломат.

Маонинг қайд этишича, дунёдаги фақат битта Хитой бор ва Тайван унинг бир қисми ҳисобланади, «Хитой Халқ Республикаси ҳукумати эса Хитойнинг ягона легитим ҳукуматидир». «Ватанни тўлиқ бирлаштириш Хитойдаги барча ўғил-қизларнинг умумий орзуси ва муқаддас бурчидир», — дейди ТИВ вакили.

Аввалроқ АҚШ президенти Жо Байден Хитой Тайванга ҳужум уюштирадиган бўлса, Қўшма Штатлар оролни ҳимоя қилишга тайёр эканини билдирганди. Шунингдек, Тайван президенти давлат ўзини ҳимоя қилишини айтган. Хитой эса АҚШдан Тайван билан алоқаларни тўхтатишни талаб қилганди.