Шавкат Мирзиёев 20 сентябрь куни Тожикистон президенти Эмомали Раҳмон ва Қирғизистон президенти Садир Жапаров билан телефон орқали мулоқот қилди. Бу ҳақда Президент матбуот хизмати хабар берди.

Қай этилишича, мулоқотда Тожикистон—Қирғизистон чегарасида рўй берган фожиали воқеалар билан боғлиқ масалалар муҳокама қилинган. Шавкат Мирзиёев чегара ҳудудида кўплаб инсонлар қурбон бўлгани муносабати билан чуқур ҳамдардлик билдирган. Вазиятни нормаллаштириш юзасидан келишувга эришилгани мамнуният билан қайд этилган.

Шунингдек, Шанхай ҳамкорлик ташкилоти Самарқанд саммитининг асосий якунлари ва унинг доирасида ўтказилган икки томонлама учрашув юзасидан фикр алмашилган.

Олий даражадаги тадбирлар давомида қабул қилинган, энг аввало, энергетика, саноат, қишлоқ хўжалиги ва бошқа тармоқларда кооперация лойиҳаларини тайёрлашни тезлаштириш ва илгари суриш бўйича қарорларни тез фурсатда амалга ошириш муҳимлиги қайд этилган.

Устувор йўналишлардаги кооперация лойиҳалари бўйича келишувларни рўёбга чиқариш, шу жумладан, Хитой—Қирғизистон—Ўзбекистон темир йўлини қуриш лойиҳасини илгари суриш муҳимлиги алоҳида таъкидланган.

Эслатиб ўтамиз, аввалроқ Путин Қирғизистон ва Тожикистон раҳбарлари билан телефон орқали суҳбатлашгани ҳақида хабар берилганди. Президентлар мулоқотда Тожикистон—Қирғизистон чегарасидаги вазият ҳақида суҳбатлашган. Шунингдек, Путин ҳамкасбларига масалани тинч ва дипломатик йўл билан ҳал қилиш зарурлигини таъкидлаган.