Шавкат Мирзиёев Тошкент вилоятидаги масъуллар деҳқончилик ва чорвачиликнинг бор имкониятларининг 50 фоизидан ҳам фойдаланилмаётгани ҳақида гапирди, деб хабар беради Президент матбуот котиби.

Қайд этилишича, Тошкент вилоятида полиз, картошка, мева ва узум ҳосилдорлиги қолган ҳудудлардан 1,5-2 баравар паст, сақлаш ва қайта ишлаш қувватлари камлиги натижасида 35 фоиз маҳсулот йўқотилмоқда.

Шавкат Мирзиёев вилоятдаги деҳқончилик ва чорвачиликка масъуллар бор имкониятнинг 50 фоизидан ҳам фойдаланмаётгани, ер майдонлари катта бўлса ҳам, мева-сабзавот экспорти кўпаймаётгани, гўшт етиштириш пойтахт ва вилоят эҳтиёжлари учун умуман етарли эмаслигини кўрсатиб ўтган.

Шу муносабат билан:

• Оҳангарон туманининг тоғолди ҳудудларида камида 50 минг гектар ерларни ўзлаштириш дастурини ишлаб чиқиш;
• 9 минг гектарни деҳқон хўжаликларига тарқатиш;
• Тошкент, Паркент, Янгийўл, Қибрайда логистика марказларини ишга тушириб, уларга 50 миллион доллар йўналтириш;
• Тошкент, Паркент ва Қибрай туманларида йил якунига қадар 4 миллион дона мева ва ток кўчатлари тайёрлайдиган питомникларни ташкил қилиш топширилган.

Умуман, аҳоли томорқасидан йилига 2-3 марта ҳосил олиш йўлга қўйилмаса, қишлоқларда муносиб ҳаёт ташкил этиш бўйича қўйилган мақсадга эришиб бўлмаслиги таъкидланган.

Аввалроқ Шавкат Мирзиёев 22 сентябрь, пайшанба куни Тошкент вилоятининг Нурафшон шаҳрига ташриф буюриши тўғрисида хабар берилганди. Президент Тошкент вилояти ҳокимлигига Зойир Мирзаев номзодини таклиф қилган.