Украиналик хакерлар Россиянинг «Мир» тўлов тизимига ҳужум уюштирмоқда
Украиналик хакерлар қатор давлатларда Россиянинг «Мир» тўлов тизимидан фойдаланиш тўхтатилгани муносабати билан унга кенг кўламли DDoS-ҳужум уюштирди, деб хабар беради «Коммерсантъ».
Ҳужумдан мақсад — тизимда юкламани ошириб, карталарга хизмат кўрсатишда носозликни келтириб чиқариш. Украинага нисбатан ҳарбий операциялар бошланиганида Россиянинг барча IT-инфратузилмалари оммавий равишда хакерлар ҳужумига учраган эди.
Қайд этилишича, украиналик IT-фаоллар Россиянинг «Мир» тўлов тизими ҳамда унинг оператори бўлган Миллий тўлов карталари тизимига DDoS-ҳужумларни ўтказмоқда, шунингдек, ҳужумлар Украина тарафдорлари бўлган фаоллар томонидан мувофиқлаштириляпти. Улар, хусусан, тўловлар ва терминалларда узилишларни келтириб чиқариш учун браузерлар ёки одатдаги DDoS воситаларидан фойдаланган ҳолда тизимларга трафик ҳосил қилади.
Эслатиб ўтамиз, 19 сентябрь куни Туркиянинг айрим банклари «Мир» билан ишлашни тўхтатган. 21 сентябрь куни — Қозоғистон ва Вьетнам ҳам шундай қарор қабул қилган. 23 сентябрь куни Туркия президенти Ражаб Тоййиб Эрдўғон вазирларга Россия билан ишлаш учун «Мир»нинг муқобилини яратишни топширган, Ўзбекистон эса «техник жараёнлар ўтказилаётгани сабаб» республикада «Мир» карталарига хизмат кўрсатиш тўхтатилганини маълум қилган.
