АҚШ давлат котибининг халқаро жамоатчилик билан алоқалар бўйича ёрдамчиси Элизабет Трюдо Ўзбекистонга ташриф буюради. Бу ҳақда Давлат департаменти матбуот хизмати хабар берди.

Қайд этилишича у 28 сентябрдан 9 октябрга қадар Непал, БАА, Ўзбекистон ва Қирғизистонга сафарлар уюштиради. 12 кунлик сафар АҚШ дипломатик миссияларининг сиёсий масалалар бўйича ишлари, устувор маълумотларни алмашиш, хусусан, Россия ва Хитойнинг ёлғон ахборотларига қарши туриш, Афғонистон халқини доимий қўллаб-қвватлаш, ижтимоий тенглик, ОАВ эркинлиги ва иқлим масалаларига бағишланади.

Ўзбекистонга ташриф давомида Трюдо Вебстер университетининг «Инглиз тили оммавий ахборот воситалари профессионаллари учун» дастури битирувчилари олдида чиқиш қилади. Шунингдек, мамлакатдаги ННТ вакиллари билан учрашади. Бундан ташқари, унинг Жиззахга ташрифи режалаштирилган.

Аввалроқ Ўзбекистон ва АҚШ Афғонистон йўналишида ҳамкорликни кенгайтириши тўғрисида хабар берилганди. Шунингдек, АҚШ ҳукумати Афғонистонни назорат қилувчи «Толибон» ҳукуматини четлаб ўтиб, мамлакатга 3,5 миллиард доллар беришга қарор қилган эди.