Россиянинг жанубий ва марказий қисмларидаги 11 та аэрпортда парвозларга қўйилган вақтинчалик чеклов режими 10 октябрга қадар узайтирилди. Бу ҳақда «Росавиация» хабар берди.

Парвозлар аввалгидек Анапа, Белгород, Брянск, Воронеж, Геленжик, Краснодар, Курск, Липетск, Ростов-на-Дон, Симферополь ва Элиста аэропортларида вақтинча чекланган. Мамлакатнинг қолган ҳаво бандаргоҳлари штат режимида ишламоқда.

«Россия авиакомпанияларига йўловчилар ташишни Сочи, Волгоград, Минеральние Води, Ставропол ва Москва аэропортларидан фойдаланган ҳолда муқобил йўналишларни ташкиллаштириш тавсия этилган», — дейилади идора хабарида.

Россия жануби ва марказидаги авиақатновларга чекловлар 24 февралда қўйилган эди. 1 августда «Росавиация» авиакомпаниялар ва аэропортларга давлат дастури бўйича 54 миллиард рубль субсидия ўтказиб бергани айтилганди.

Идоранинг таъкидлашича, ушбу қўллаб-қувватлаш чоралари авиакомпанияларнинг ликвидлигини таъминлаган ва уларга ички йўналишларда ташишни давом эттиришга имкон берган.

Эслатиб ўтамиз, март ойида Россия Ўзбекистон билан авиақатновларда киритилган чекловларни бекор қилганди. Аввалроқ Финляндия яқин кунларда россиялик туристларнинг мамлакатга киришини тақиқлаши, Европа Комиссияси Россияга қарши янги санкциялар эълон қилиши тўғрисида хабар берилганди.