Американинг Флорида штатига ёпирилган «Иэн» тўфони қурбонлари сони 45 кишига етди. Штатдаги 1,5 миллион истеъмолчи ҳамда бошқа штатларнинг юз минглаб аҳолиси электр энергияси таъминотисиз қолган. Бу ҳақда CNN телеканали хабар берди.

Флорида штатига тўфон 28 сентябрь куни ёпирилган эди. У кенг кўламни вайронагарчиликлар ва рекорд даражада сув тошқинларини юзага келтирган. АҚШ президенти Жо байден фавқулодда ҳолат режимини эълон қилган. Унинг сўзларига кўра, «Иэн» Флорида тарихидаги энг ҳалокатли тўфонга айланиши мумкин. Америка етакчисининг ҳисоблашича, штатнинг қайта тикланишига ойлар ёки йиллар талаб этилади.

Тўфондан АҚШнинг бошқа штатлари, жумладан, Жанубий Каролина ҳам зарар кўрган. 30 сентябрь кечга бориб «Иэн» тропик циклон даражасига қадар пасайган. Жанубий Каролинадан ҳозирга қадар кучли тўлқинлар, кутилмаган сув тошқинлари ва шамол прогноз қилинмоқда.

Аввалроқ Флорида штати губернатори Ро ДеСантис Форт-Меерс порт шаҳрига «мисли кўримлаган» зарар етказилганини айтганди. «Эстеро кўрфазининг ўртасида турган уйни кўриб, шамол ва тўфон кучи қандай бўлганини тушуниш мумкин», — деган у.

Эслатиб ўтамиз, 2021 йилнинг августида АҚШнинг Луизиана штатига тарихдаги энг кучли тўфонлардан бири бўлган «Айда» тўфони ёпирилирган ва оқибатда миллиондан ортиқ одам электрсиз қолганди. Сентябрь ойида эса Хитойнинг шарқий соҳилларига кучли «Чанту» тўфони ёпирилганди.