«Ҳудудий электр тармоқлари» Қашқадарё вилоятининг Ғузор туманида электромонтёр билан содир бўлган бахтсиз ҳодисага муносабат билдирди.

Маълум қилинишича, 5 октябрь куни «Қашқадарё ҲEТК» АЖ Ғузор ТEТК тезкор чиқиш бригадаси томонидан 110/35/10 кВли «Ғармистон» ПСдан чиқувчи 10 кВли «Ғузор—Совбоғ» фидерининг «Микоп» шохобчаси авариядан сўнг кўрикдан ўтказилган. Шундан сўнг, соат 14:30 атрофида фидерга кучланиш берилган.

Бироқ тезкор бригада ходимлари наряддан ташқари ўзбошимчалик билан мавжуд қоидаларни бузган ҳолда, 110/10 кВли «Ғузор» ПСдан чиқувчи 10 кВли «Охунбобоев» фидерининг 36-таянчидан истеъмолчи балансида бўлган таянчга ўтадиган симларни ечишга уринган вақтда электромонтёр Ғ.Б. кучланиш остига тушган.

Тезкор бригада томонидан жабрланган Ғ.Б. таянчдан тушириб олиниб, унга биринчи ёрдам кўрсатилган ҳамда тез ёрдамга хабар берилган. Етиб келган тез ёрдам шифокорлари кучланиш остига тушган электромонтёрни кўрикдан ўтказганда, унинг вафот этгани аён бўлади.

Мазкур ҳолат юзасидан «Ҳудудий электр тармоқлари» АЖ раҳбарияти томонидан ишчи гуруҳ тузилиб, айни пайтда Қашқадарё вилоятида мазкур ҳодисанинг сабаблари атрофлича ўрганилмоқда.

Аввалроқ Андижонда TikTok’ка видео олиш учун поезд вагони устига чиққан йигитни ток урган, Тошкент вилоятида эса 2-академик лицей талабаси темир йўл бекатидаги вагон устига чиқиши оқибатида ток уриб, ҳалок бўлганди.