Хайрли кеч, ушбу ўқиб турганингиз — «Бугун»нинг сўнгги етти кунликдаги энг муҳим ва сара хабарлари жой олган ҳафталик дайжести.

Шавкат Мирзиёевнинг Венгрияга ташриф буюриши, Чирчиқдаги заводда содир бўлган портлаш, Илон Маскнинг Украина бўйича берган таклифи-ю, Таиланддаги боғчада содир бўлган отишма билан эсда қолган ҳафта ҳам ўз ниҳоясига етиб бормоқда. Қуйида ҳафтанинг энг муҳим хабарлари жамланган дайжест билан танишиб чиқишингиз мумкин.

Якунига етган ҳафтада ўзбекистонликлар ҳаётида нималар содир бўлди?

Душанба — 3 октябрь

Шавкат Мирзиёев Венгрияга борди

Президент Шавкат Мирзиёев 3 октябрь куни расмий ташриф билан Венгрияга борди. Давлат раҳбари Венгрия президенти Каталин Новак ва Бош вазир Виктор Орбан билан учрашди. 3 октябрь куни бўлиб ўтган Ўзбекистон-Венгрия бизнес форумида умумий қиймати 1 миллиард долларлик инвестиция, савдо ва молиявий келишувлар имзоланди. Икки давлат ўртасидаги қўшма лойиҳаларни молиялаштириш учун қўшма фонд тузишга келишиб олинди. «Ҳунгарикум» дастури доирасида ўзбекистонлик талаба ва докторантлар учун ажратиладиган квоталар сони 170 тагача оширилди. Шунингдек, Будапештда Ўзбекистоннинг дипломатик ваколатхонасини очиш бўйича ҳам келишувга эришилди.

Сешанба — 4 октябрь

Чирчиқдаги заводда портлаш содир бўлди

Тошкент вилояти Чирчиқ шаҳридаги «Максам Чирчиқ» заводида 4 октябрь куни соат 8:30 ларда портлаш содир бўлди. Ҳодиса оқибатида икки киши жароҳат олиб, шифохонага жўнатилди. Портлашдан сўнг келиб чиққан ёнғин соат 10:00 ларга бориб ўчирилган. Воқеа жойига бош вазир ўринбосари, энергетика вазири Жўрабек Мирзамаҳмудов етиб борган. Энергетика вазири раислигида ҳукумат комиссияси тузилиб, портлаш сабаблари ўрганилаётгани маълум қилинган.

Ягона мактаб формаси ташаббуси бекор қилинди

Вазирлар Маҳкамасининг тегишли қарорига кўра, 2022/2023 ўқув йилидан бошлаб давлат умумий ўрта таълим муассасаларида ўқувчилар учун тасдиқланган шакллардаги ягона мактаб формасини жорий этиш талаби бекор қилинди.

Чоршанба — 5 октябрь

Фарғонада қайнота келинини ўлдириб, бошини узиб олди

Фарғонадаги туманларнинг бирида 64 ёшли қайнота келинини ўлдириб, бошини узиб олди. Маълум қилинишича, қайнота келини билан тортишиб қолган. Сўнг уни уриб хушидан кетказган ва машинага ортиб адирликка олиб борган. Пичоқ билан бошини узиб олганидан сўнг, жасадни ахлатхонага ташлаган, бошни эса ўзи яшайдиган туманда жойлашган фермер хўжаликларидан бирига яширган.

Пайшанба — 6 октябрь

Шавкат Мирзиёев Владимир Путинни «Олий Даражали Дўстлик» ордени билан мукофотлади

Шавкат Мирзиёев Россия президенти Владимир Путинни мамлакатлар ва халқлар ўртасидаги анъанавий дўстлик ва ҳамкорлик ришталарини ривожлантириш ҳамда таваллудининг 70 йиллик юбилейи муносабати билан «Олий Даражали Дўстлик» ордени билан мукофотлади.

Наманганда бир гуруҳ ўқувчилар ўқитувчини калтаклади

Ижтимоий тармоқларда Наманган вилояти Косонсой туманидаги 29-мактабда ўқувчилар ўқитувчини калтаклагани акс этган тасвир тарқалди. Қайд этилишича, ҳолат физика дарсида рўй берган. Ўқитувчи дарсга халақит берган ўқувчини хонадан чиқариб юборганидан сўнг, у қайтиб келиб, ўқитувчига ташланиб қолган. Қолган ўқувчилар эса уларни ажратишга ҳаракат қилган. Кейинроқ ўқувчининг ота-онасига маъмурий чора кўрилгани хабар берилган.

Жума — 7 октябрь

Шавкат Мирзиёев Санкт-Петербургга ташриф буюрди

Президент Шавкат Мирзиёев Мустақил Давлатлар Ҳамдўстлигининг норасмий саммитида иштирок этиш учун 7 октябрь куни Россиянинг Санкт-Петербург шаҳрига ташриф буюрди. Президентни Санкт-Петербургдаги «Пулково» халқаро аэропортида шаҳар губернатори Александр Беглов, Ленинград вилояти губернатори Александр Дрозденко ва бошқа расмийлар кутиб олган.

Шунингдек, Шавкат Мирзиёев шу куни Мустақил Давлатлар Ҳамдўстлиги саммитида ҳам иштирок этди. Саммитда келаётган ҳафтада Остона шаҳрида бўлиб ўтадиган МДҲ Давлат раҳбарлари кенгашининг навбатдаги мажлисига тайёргарлик билан боғлиқ долзарб масалалар кўриб чиқилди.

Ўзбекистон Хитойнинг уйғурларга нисбатан жиноятлари текширилишига қарши чиқди

Бирлашган Миллатлар Ташкилотида Ўзбекистон ва яна 18 та давлат Хитойнинг Шинжон-Уйғур мухтор вилоятидаги уйғурларга нисбатан амалга оширган жиноятлари текширилиши юзасидан сўровни рад этди. Ўзбекистондан ташқари Покистон, Қатар, Индонезия, Бирлашган Араб Амирликлари, Қозоғистон каби давлатлар ҳам лойиҳага қарши чиққан. Германия, Финландия, Чехия, АҚШ, Жанубий Корея эса аксинча, текширув ўтказишни ёқлаган. 19 давлат қарши овоз бериши натижасида Хитойдаги мусулмон аҳолининг ҳуқуқлари бузилиши масаласи БМТ инсон ҳуқуқлари кенгаши кун тартибига киритилмаган.

Шанба — 8 октябрь

Андижондаги мактабда дарслар стол-стулсиз хонада ўтилаётгани хабар қилинди

Ижтимоий тармоқларда Андижон вилоятидаги мактаблардан бирида дарслар стол-стулларсиз хонада ўтилаётгани тасвирланган видео тарқалди. Таъкидланишича, видеода Асака туманидаги 29-мактаб тасвирланган. Туман халқ таълим бўлими берган муносабатда 28-сонли мактаб таъмирланаётгани ва шунинг учун ушбу мактабнинг 428 нафар юқори синф ўқувчилари вақтинчалик 3,5 километр узоқликдаги 29-мактабга кўчирилгани хабар қилинган. Шунингдек, ўқувчиларга қулайлик яратиш мақсадида махсус автобус ҳам ташкил қилиб берилган.

Видео эса 28-мактаб ўқувчиларига дарс машғулотлари тугаганидан сўнг тўгарак ўтилаётган вақтда, хонада парталар алмашиниш жараёнида тасвирга олингани учун хонада керакли жиҳозлар йўқдек туюлиб қолгани айтилган.

Якунига етган ҳафтада жаҳонда қандай воқеалар содир бўлди?

Душанба — 3 октябрь

Арманистон ҳукумати Озарбайжонни асирликдаги ҳарбийларни отиб ташлашда айблади

Ижтимоий тармоқларда 2 октябрь куни тиз чўкиб турган ҳарбийларнинг бошқа ҳарбийлар томонидан отиб ташлангани акс этган тасвирлар тарқалганди. Арманистон ҳукумати бу воқеа 13 сентябрда содир бўлганини таъкидлаб, Озарбайжонни асирликдаги ҳарбийларни ўлдиришда айблади. Озарбайжон томони эса видеонинг ҳақиқийлиги текширилаётганини маълум қилди.

Сешанба — 4 октябрь

Шимолий Корея Япония томон баллистик ракета учирди

Шимолий Корея ракетаси беш йил ичида илк бор Япония ҳаво ҳудудини кесиб ўтди. Таъкидланишича, ракета 4,5 минг километр узоқликка учиб, ҳавода 20 дақиқа парвоз қилган. Япония шимолий ҳудудларида сиреналар янграб, аҳолидан бино ичига кириш ёки ер остига тушиш сўралган. Ракета Япония шарқий соҳилидан 3 минг километр узоқликка, Тинч океанига бориб тушган. Шу куннинг эртасига эса АҚШ ва Жанубий Корея КХДР баллистик ракета учиришига жавобан «ер-ер» туркумига кирувчи иккита ракетасини синовдан ўтказди. Бироқ, Япон денгизига йўналтирилган ракеталардан бири ҳарбий қисм ҳудудига қулаб тушган.

Илон Маск Қримни Россияга расман беришни таклиф қилди

Илон Маск Украина учун тинчлик режасини тақдим қилди. Унга кўра Украинада тинчликка эришиш учун унинг босиб олинган ҳудудларида БМТ вакиллари назоратида қайта овоз бериш ўтказилади, агар аҳолининг талаби Украина бўлса, Россия мамлакатни тарк этади.

Шунингдек, унинг фикрига кўра, тинчликка эришиш учун Қрим расман Россияга берилиши керак. Маск буни Қрим 1783 йилдан бошлаб «Брежнев хатосига қадар» Россия таркибида бўлиб келгани билан изоҳлайди. У таклиф қилган дастурда Қрим сув таъминоти кафолатланиши ва Украинанинг нейтрал давлат бўлиб қолиши ҳам қайд этилган. Миллиардер тинчлик дастурини эълон қилганидан сўнг TESLA акциялари қиймати 9 фоизга пастлаган.

Чоршанба — 5 октябрь

Илон Маск Twitterʼни сотиб олиш учун иккинчи марта сўров юборди

Америкалик миллиардер Илон Маск Twitterʼни сотиб олиш учун иккинчи марта сўров юборди. Аввалги сафар Twitter маъмурлари ижтимоий тармоқдаги бот ва спам-аккаунтлар сонини маълум қилишдан бош тортгани учун бу харид амалга ошмаган эди. Қайд этилишича, Илон Маск яна Twitterʼни ҳар бир акцияси учун 54,20 доллардан, яъни 44 миллиард долларга сотиб олмоқчилигини маълум қилган. Маскнинг янги таклифидан сўнг Twitter акциялари қиймати 18 фоизга ошган.

Пайшанба — 6 октябрь

Таиландда қуролланган эркак боғчага ҳужум уюштирди

Таиландда қуролланган эркак боғчага ҳужум уюштириши оқибатида 36 киши, жумладан 24 нафар бола ҳалок бўлди. Таъкидланишича, гумонланувчи полиция собиқ сержанти бўлган. Боғчага ҳужум вақтида у ўқотар қурол ва пичоқ ёрдамида йўлида учраган одамларга зарар етказишга ҳаракат қилган. Шунингдек, у боғчадаги отишмадан сўнг ўз жонига қасд қилган.

Жума — 7 октябрь

Лукашенко Путинга трактор совға қилди

Беларус президенти Александр Лукашенко Владимир Путиннинг туғилган кунига Беларус трактори ва сертификат совға қилди. Совға ҳақида у «Улар Украинада оч қолмаслиги ва нон ўғирламаслиги учун биргаликда ғалла экамиз ва Европага жўнатамиз»,— дея ҳазил қилган.

Шанба — 8 октябрь

Қрим кўприги портлади

Қрим яриморолини Россия билан боғлайдиган стратегик аҳамиятга эга бўлган кўприк портлади. 8 октябрь соат 06:05 да Керч бўғози устидан ўтган кўприкда юк машинаси портлаши оқибатида кўприкдан ўтаётган ёнилғи ташийдиган поезднинг цистернасида ёнғин келиб чиққан. Кўприкдаги автомобиль ҳаракати тўхтаб қолган. Бўғоз бўйлаб кемалар ҳаракати тўхтатилмагани хабар қилинган. Ҳодиса оқибатида 3 киши ҳалок бўлган. Улардан икки нафар эркак ва аёлнинг жасади сувдан олиб чиқилган. Таъкидланишича, портлаган юк машинасининг эгаси Краснодар ўлкасида яшовчи фуқаро бўлиб, унинг яшаш жойида тергов ҳаракатлари бошланган.

Украина президенти Зеленский офиси эса кўприк портлашига муносабат билдириб, буларнинг барчаси «бошланиши» ва «ноқонуний ҳар бир нарса йўқ қилиниши керак»лигини айтган.

Ҳафтанинг асосий воқеликлари шулардан иборат эди.

Бугун билан яшанг. «Бугун»да қолинг.