Шавкат Мирзиёев раислигида маҳаллаларда тизимли муаммоларни ҳал қилиш бўйича видеоселектор йиғилиши бўлиб ўтди. Бу ҳақда Президент матбуот хизмати хабар берди.

Қайд этилишича, тадбир аввалида бошланган ислоҳотлар, амалга оширилаётган лойиҳаларнинг барчаси инсон қадрини таъминлаш орқали аҳолини рози қилишга қаратилгани яна бир бор таъкидланган.

Шунингдек, 2022 йилги дастурлар доирасида 4100 та маҳаллани обод қилиш, боғча, мактаб, соғлиқни сақлаш, сув, электр, канализация билан боғлиқ муаммоларини ҳал қилишга бюджетдан қарийб 29 триллион сўм маблағ ажратилгани кўрсатиб ўтилган. Бунинг натижасида:

• 434 та маҳаллада ички йўллар таъмирлангани;
• 672 та маҳаллага ичимлик суви тармоғи тортилгани ҳисобига, 1,5 миллион аҳоли илк бора тоза ичимлик суви билан таъминлангани;
• жорий йилда 2 мингдан ортиқ маҳаллага хизмат қиладиган 34 та янги мактаб ишга туширилди, 338 таси реконструкция қилиниб, 360 таси таъмирланди. Буларнинг ҳисобига 78 мингта янги ўқувчи ўринлари яратилгани;
• жойларда 580 та трансформатор, 20 минг километр тармоқлар янгиланиб, 413 та маҳалладаги 1,5 миллион нафар аҳолининг электр таъминоти яхшилангани маълум қилинди.

Аввалроқ Жиззахда олиб борилаётган ободонлаштириш ишлари ҳақида маълумот берилганди. Президент Халқ қабулхоналари мутасадди ташкилотлар билан ҳамкорликда мазкур ҳудудларда аниқланган муаммоларни комплекс ҳал этиш чора-тадбирлари кўрилмоқда. Натижада жорий йилнинг ўзида 28 та маҳалла ва улар таркибидаги 40 дан зиёд чекка ва олис қишлоқларда инфратузилмани ривожлантириш, аҳолининг даромадли бўлиши, тадбиркорлик ҳамда бандлик борасидаги ташаббусларига тўсиқ бўлаётган масалаларни ҳал этишга эришилган.