Қашқадарё вилоятининг Шаҳрисабз туманида сотиб олинган автомобиль эгасига қалбаки пулларни берган шахслар аниқланди. Бу ҳақда Бош прокуратура матбуот хизмати «Bugun.uz»га хабар берди.

Маълум қилинишича, 7 октябрь куни Шаҳрисабз тумани «Шаматон» маҳалласида яшовчи 25 ёшли А.Жумаев ҳамда 23 ёшли Р.Муродов фуқаро М.Назарованинг Cobalt’ини 13,4 минг долларга сотиб олишга келишган. Улар ўзларида аввалдан сақлаб келган қалбаки бир хил серия ва рақамларга эга бўлган 134 дона 100 долларлик купюрада жами 13,4 минг долларни фуқаро М.Назаровага транспорт воситаси пули сифатида берган.

10 октябрь куни Бош прокуратура департаментининг Шаҳрисабз туман бўлими томонидан А.Жумаев ва бошқаларга нисбатан Жиноят кодексининг 176-моддаси (Қалбаки пул, акциз маркаси ёки қимматли қоғозлар ясаш, уларни ўтказиш) 2-қисми «б,в» бандлари ва бошқа моддалар билан жиноят иши қўзғатилган.

Аввалроқ ДХХ қалбаки пул тайёрлаётган уюшган гуруҳни қўлга олгани хабар қилинганди. Бундан ташқари, Тошкент вилоятида қалбаки пулларни муомалага киритган эркак ушланган.