Иқтисодчи Отабек Бакиров «Kommers.uz» нашрига берган интервьюсида Ўзбекистонга келаётган муҳожирларга нисбатан одамларнинг муносабати ҳақида ўз фикрларини билдирди.

Унинг сўзларига кўра, Россиядан кириб келаётган муҳожирларнинг Ўзбекистон иқтисодиётига, умуман ўзбек жамиятига таъсири ҳақида икки хил қараш бор.

«Биринчиси, эйфория — бизни бойитади, инсон капиталини кенгайтиради, имкониятларимизни оширади, деган иқтисодий асосланган қарашлар. Иккинчиси, негатив — бу ишчи ўринларимизни камайтиради, деган кайфият. Яъни иқтисодиётда — уй жой, ижара, озиқ-овқат бозорида мини-шоклар юзага келтиради дейдиганлар.

Шу иккала тоифада ҳам қутблашиш бор. Уларнинг ҳар бирида ҳам адашиш ва ортиқча эмоцияларга берилиш мавжуд. Шунинг учун биз ҳар қандай миграцияга нисбатан рационал қарашга ўрганишимиз керак. Албатта, ҳар бир давлат миграцияга нисбатан ўзининг рационал сиёсатини ташкил эта олса, мамлакатнинг иқтисодий ўсишига доимий равишда кўмак бўлади», — дейди Бакиров.

Аввалроқ Отабек Бакиров урушдан аввал ўртадан юқори бўлган сегментдаги профессионал мутахассисларни Ўзбекистонга жалб қилиш Қозоғистонга жалб қилишдан кўра 2-2,5 баробар қимматроқ бўлганини айтганди. Яъни улар Ўзбекистонга келиш учун ҳамма вақт Қозоғистонга боришдан кўра кўпроқ нарх сўраб келган. Ҳозир шу нархлар тахминан тенглашган. Шу тарафдан Ўзбекистондаги меҳнат бозорининг айрим сегментлари ютган.