Ўзбекистон ва Россия реабилитация индустриясини ривожлантириш тўғрисида меморандум имзолади, деб хабар беради «Anhor.uz»

Қайд этилишича, Россиянинг функционал протезларни ишлаб чиқарувчи «Моторика» компанияси Тиббий ва ижтимоий хизматларни ривожлантириш агентлиги билан учрашувда республикада реабилитация индустриясини модернизация қилиш масалаларини муҳокама қилган. Ўзбекистон аҳолисини ижтимоий ҳимоя қилиш стратегиясига кўра, ногиронлиги бўлган шахсларни замонавий протез-ортопедия буюмлари билан таъминлаш, 2030 йилгача эҳтиёжмандлар учун уларнинг эҳтиёжини тўлиқ қоплаш дастурини ишга тушириш режалаштирилган.

«Моторика» ўзининг техник реабилитация ускуналари қаторини, тўлиқ циклли реабилитация дастурини ва бошқариш кўникмаларини ривожлантириш тизимини, шунингдек, кибер-қўллар орқали тегиниш ҳиссиётларини узатиш соҳасидаги ишланмаларни тақдим этган.

Бундан ташқари, республика протез-ортопедия саноати мутахассислари юқори функционал протезларни ўрнатиш бўйича ўқитилган. Компания республиканинг икки нафар ёш резидентини протезлар билан таъминлаган: 5 ёшли бола учун фаол тортиш протези ва 15 ёшли ўсмир учун бионика.

Томонлар ўзаро ҳамкорлик, тажриба алмашиш ва ногиронлиги бўлган инсонларни янги экотизимлар билан таъминлаш борасидаги қўшма лойиҳаларни амалга оширишга келишиб олган.

Эслатиб ўтамиз, 2021 йилда Ўзбекистонда ногиронлиги бўлганлар давлат ҳисобидан протез-ортопедия мосламалари билан таъминланаши маълум қилинганди. Президент қарорида ҳар йили камида 100 нафар бемор болага жарроҳлик амалиётлари давомида суяк дефектларини тўғрилаш учун коллопан гранулаларини харид қилиш белганланган эди.