Наманган вилоятида 27 сентябрь куни катта тезликда келаётган Epica 9 ёшли мактаб ўқувчисини уриб юборгани ҳақида хабар берилганди. Вилоят Йўл ҳаракати хавфсизлиги бошқармаси матбуот хизмати боланинг ҳозирги ҳолати ҳақида маълумот берди.

Қайд этилишича, боланинг онаси ижтимоий тармоқларда тарқалаётган хабарлардан норози. Унга кўра, ҳайдовчи шу заҳоти болага керакли бўлган барча ёрдамларни кўрсатган ва унга сарфланаётган харажатларни молиялаштирган. Ҳозирда бола тирик ва ижтимоий тармоқларда ҳолат нотўғри талқин қилинган.

«Ҳозир ўғлим шифохонада, қайтариб берди Аллоҳим. Лекин ҳайдовчининг эҳтиётсизлиги билан бу ҳолат келиб чиққан. Ўғлим тирик, ҳозир мен билан бирга. Шифокорларга ҳам раҳмат, қўлидан келган ҳамма ишни қилиб, ўғлимни оёққа турғазиб беришди», — деган боланинг онаси.

Шифокорларнинг таъкидлашича, бола ўта оғир ахволда шифохонага олиб келинган. Кўрсатилган тиббий ёрдамлар натижасида унинг ҳаёти сақлаб қолинган. Ҳозирда бола мутахассисларнинг доимий назоратида бўлиб келмоқда.

«Бемор болалар бўлимида 27 сентябрдан, 14 октябрга қадар муолажа олган. 14 октябрь куни шаҳар болалар шифохонаси Неврология бўлимига ўтказилган. Ҳолати стабил-оғир. Онасининг сўзларига кўра, у билан қисман мулоқот қилмоқда. Ҳозирда мунтазам шифокорлар назоратида керакли бўлган барча даво муолажаларини олмоқда» — деган навбатчи шифокор.

Ҳолат юзасидан шаҳар Ички ишлар органлари фаолиятини мувофиқлаштириш бошқармаси тергов бўлими томонидан дастлабки тергов ҳаракатлари олиб борилаётгани маълум қилинган.