Европа Кенгаши президенти Шарль Мишель 28 октябрь куни Ўзбекистонга келади. Бу ҳақда Ўзбекистон Президенти матбуот хизмати хабар берди.

Маълум қилинишича, Шавкат Мирзиёев давлат раҳбарларининг Марказий Осиё—Европа Иттифоқи форматидаги биринчи мажлисида иштирок этиш учун  27 октябрь куни амалий ташриф билан Остона шаҳрида бўлади.

Тадбирда Европа Кенгаши президенти Шарль Мишель ва минтақа мамлакатларининг етакчилари иштирок этиши кўзда тутилган.

Саммит кун тартибига мувофиқ, сиёсий мулоқотни ривожлантириш, ҳудудлараро ҳамкорликни кенгайтириш, савдо-иқтисодий шериклик ва маданий-гуманитар алмашинувларни фаоллаштириш истиқболлари муҳокама қилинади.

Шунингдек, шу кун кечаси Шарль Мишель Ўзбекистонга келиши кутилмоқда.

28 октябрь куни эса Ўзбекистон ва ЕИ ўртасида олий даражадаги музокаралар бўлиб ўтади. Мамлакатнинг Европа Иттифоқи билан икки ва кўп томонлама ҳамкорлигига оид масалаларнинг кенг доираси кўриб чиқилади.

«Олий мартабали меҳмон юртимизга ташрифи чоғида Самарқанд шаҳрига ташриф буюради», дейилади матбуот хизмати хабарида.

Аввалроқ Туркия президенти Ражаб Тоййиб Эрдўғон рафиқаси Эмине Эрдўғон билан 29 март куни Ўзбекистонга ташриф буюрганди. Шунингдек, Шавкат Мирзиёев ва Туркманистон президенти Гурбангули Бердимуҳамедов 29 апрель, пайшанба куни «Туркманбоши руҳи» мажмуасига ташриф буюрганди.