Янгиҳаёт, Сергели ва Чилонзор туманларининг баъзи маҳаллаларида газ таъминоти вақтинча тўхтатилди. Бу ҳақда «Ҳудудгаз Пойтахт» газ таъминоти филиали матбуот хизмати хабар берди.

Қайд этилишича, Янгиҳаёт тумани «Чоштепа» маҳалласи ҳудудидан ўтган юқори босимли Д-530 миллиметрли газ қувурига электрон газ ҳисоблагич ўрнатиш ишлари режалаштирилган. Шу сабабли 29-октябрь куни соат 10:00 дан 18:00 га қадар «Янги Чоштепа», «Чоштепа» маҳаллаларида, Сергели тумани «Жунариқ» маҳалласида, Чилонзор тумани «Бешқўрғон» маҳалласида ҳамда юқорида кўрсатиб ўтилган манзиллардаги барча турдаги улгуржи ташкилотларида газ таъминоти тўхтатилди.

Шунингдек, қуйидаги манзилларда газ бўлмайди:

• Чилонзор тумани Чорбоғ кўчасидаги «Эко газоил» автомобилларга газ тўлдириш компрессор шохобчаси;
• Бунёдкор кўчасидаги «ТошБусХизмат» автомобилларга газ олдириш компрессор шохобчаси.

Янгиҳаёт, Сергели, Чилонзор тумани, Тошкент ҳалқа автомобиль йўли кўчасида жойлашган юқори босимли газ қувурига уланган 25 та ишлаб чиқариш корхонасида, жумладан, автомобилларга газ тўлдириш компрессор шохобчаларида ҳам газ таъминоти вақтинчалик тўхтатилди.

Ҳудудгаз Пойтахт» газ таъминоти филиали таъмирлаш ишлари туфайли етказилаётган ноқулайликлар учун табиий газ истеъмолчилардан узр сўрайди.

Аввалроқ Тошкентдаги 5 мингта хонадонда газ таъминоти вақтинча тўхтатилгани тўғрисида хабар берилганди.