Қозоғистон компанияси Ўзбекистон ва Тожикистонга 90 миллион долларлик бензинни ноқонуний олиб киришга уринди, деб хабар бермоқда Inbussines нашри Қозоғистон Молиявий мониторинг агентлиги маълумотларига таяниб.

Маълум қилинишича, ҳуқуқ-тартибот идоралари ходимлари томонидан дастлаб 54 миллион тенге (117 минг доллар) қийматидаги  (165 тонна) АИ-95 бензини солинган учта вагон цистерна мамлакатдан Ўзбекистонга ноқонуний олиб чиқиб кетиш факти аниқланган. Кейинроқ 89 миллион тенге (190 минг доллар) қийматидаги АИ-95 бензинли (280 тонна) яна бешта цистерна топилди.

Умуман олганда, мазкур корхона Ўзбекистон ва Тожикистонга 90 миллион долларлик 100 минг тоннадан ортиқ ёнилғи экспорт қилишни мўлжаллаган. Корхона директори ўз айбига тўлиқ иқрор бўлиб, тавба қилган.

Шунингдек, бензин солинган цистерналар мусодара қилиниб, давлат давлат ҳисобига ўтган, раҳбардан аввал сотилган бензин нархи — 54 миллион тенгега ундирилди.

Суд ҳукми билан директор айбдор деб топилиб, уч йил шартли қамоқ жазосига ҳукм қилинди.