Давлат фуқаролик хизматчисининг сафарлар ва бошқа тадбирлар муносабати билан олиши мумкин бўлган совға қиймати маълум қилинди
Совға қиймати барча солиқлар ва йиғимларни ўз ичига олади
Коррупцияга қарши курашиш агентлиги томонидан норматив-ҳуқуқий ҳужжатлар лойиҳалари муҳокамаси порталига Давлат фуқаролик хизматчисининг хизмат сафарлари, халқаро ва бошқа расмий тадбирлар муносабати билан олиши мумкин бўлган совға қиймати, қабул қилиш талабларига оид низом жамоатчилик муҳокамасига қўйилди.
Мазкур низом давлат фуқаролик хизматчиси (кейинги ўринларда – давлат фуқаролик хизматчиси) томонидан хизмат сафарлари, халқаро ва бошқа расмий тадбирлар муносабати билан олиниши мумкин бўлган совға қиймати, шунингдек уни тасарруф этиш тартибини белгилайди.
Қайд этилишича, давлат фуқаролик хизматининг барча сиёсий гуруҳи, даража ва лавозимдаги давлат фуқаролик хизматчилари учун – БҲМнинг 5 бараваридан (барча солиқлар ва йиғимларни ҳисобга олган ҳолда) кўп бўлмаган миқдорида рухсат берилади.
Шунингдек, тақдим этилган совға меҳмон (мезбон) томоннинг рамзлари ва (ёки) логотипи туширилган эсдалик совғалар қиймати учун миқдор белгиланмайди ва бундай совғалар баҳоланмайди.
Тақдим этилган совға миқдори белгиланган миқдордан ошган тақдирда, ҳадянинг ошган қисми давлат фуқаролик хизматчиси томонидан давлат ташкилотига тўлаш орқали тасарруф этиши мумкин. Шу билан бирга, совғани қабул қилиш ёки тақдим этиш натижасида бирор бир тарафнинг шахсий манфаатдорлигини, шунингдек манфаатлар тўқнашуви ёки коррупциявий хавф-хатарларнинг келиб чиқишига олиб келмаслиги, хусусан, давлат фуқаролик хизматчиси фаолиятида холис қарор қабул қилишига таъсир кўрсатадиган мажбуриятни юзага келтирмаслиги лозим.
