Тошкентда тунги кўча ёритгичлари қачондан ўчирилиши маълум қилинди
Тошкентда 16 ноябрдан бошлаб вақтинчалик кўча ёритиш тармоқларини тунги истеъмолини чеклаш тартибига ўтказилади. Бу ҳақда «Тошшаҳарнур» ДУК хабар берди.
Хабарда айтилишича, «Тошшаҳарнур» давлат унитар корхонаси умумий вазифаларни бажариб, 16 ноябрдан бошлаб вақтинчалик кўча ёритиш тармоқларини тунги истеъмолини чеклаш тартибига ўтказади.
«Тошкент шаҳри аҳолиси ва меҳмонлари кечки ва тунги вақтда юзага келадиган вақтинчалик ноқулайликларни тушунадилар, шунингдек, кундалик ҳаётда электр энергиясидан оқилона ва тежамкор фойдаланишнинг умумий вазифаларини ҳал қилишда фаол иштирок этадилар, деб умид қиламиз», — дейилади хабарда.
Энергетика вазири ўринбосари Шерзод Хўжаев Ўзбекистон шаҳарларидаги ёритиш чироқлари ва электрон реклама эълонларини ўчириб қўйиш режалаштирилаётганини маълум қилганди.
Унинг сўзларига кўра, пойтахт ва вилоят марказларида электр энергияси кўп исроф қилинмоқда.
