Тошкентда автобус бекатларини ўзбошимчалик билан эгаллаб олган тадбиркорларга чора кўрилмоқда
Юнусобод тумани ҳокимлиги автобус бекатларидан биридаги йўловчилар учун мўлжалланган кутиш ўриндиқлари тадбиркорлар томонидан ташқарига чиқариб қўйилгани тасвирланган видеога муносабат билдирди.
Ижтимоий тармоқларда автобус бекатлари тадбиркорлар томонидан эгаллаб олинаётгани тасвирланган видео тарқалди. Мазкур видеоматериалда айтиб ўтилган ҳар бир ҳолат туман ҳокимлиги мутасаддилари томонидан ўрганилган.
Аниқланишича, ҳақиқатдан ҳам Юнусобод туманидаги видеода кўрсатилган манзилдаги автобекатда тадбиркор томонидан аҳолининг кутиш ўриндиқлари ташқарига чиқариб қўйилган. Ҳокимлик мутасаддилари ушбу манзилдаги тадбиркор билан юзма-юз суҳбатлашиб, ўзбошимчалик билан эгаллаган ер майдони учун қонунда белгиланган тартибда огоҳлантириш берган ҳамда у жаримага тортилган.
Бундан ташқари, шу каби ҳолатларнинг такрорланмаслиги барча автобус бекатлари Кадастр агентлиги Юнусобод тумани бўлими томонидан хатловдан ўтказилмоқда.
«Натижада ўзбошимчалик билан эгаллаган майдонлар, шу билан бирга ноқонуний рекламалар аниқланиб, тегишли чора-тадбирлари олиб борилмоқда», — дейилади муносабатда.
Эслатиб ўтамиз, 2021 йилда Тошкент автобус бекатларида Wi-Fi’га уланиш мумкин бўлиши тўғрисида хабар берилганди.
