Twitter ижтимоий тармоғида овозли ва видео қўнғироқларни амалга ошириш имконияти яратилади. Бу ҳақда TheVerge хабар берди.

Маълум қилинишича, Илон Маск компаниянинг Сан-Франсискодаги бош қароргоҳида душанба куни бўлиб ўтган «Twitter 2.0» номли тақдимотида ходимларига тўғридан-тўғри хабарлар (direct messages)ни шифрлаш ҳамда аккаунтлар ўртасида шифрланган видео ҳамда аудио қўнғироқлар имконияти яратилишини маълум қилган.

«Биз фойдаланувчилар ўз хавфсизлигидан қайғурмаган ҳолда, уларнинг тўғридан-тўгри хабарлари интернетга чиқиб кетишидан ёки Twitter’даги кимдир уларнинг шахсий хабарларини кузатаётганидан хавотирланмасдан мулоқот қилиш имкониятига эга бўлишларини хоҳлаймиз. Бу албатта яхши ҳолат эмас ва олдин бир неча бор кузатилган», — дейди Илон Маск.

Эслатиб ўтамиз, аввалроқ Twitter расмий тасдиқланганлик белгисига эга обуначилар учун ойига 7,99 долларлик обунани жорий қилганди. Шунингдек, 2021 йилда блокланган АҚШнинг 45-президенти Дональд Трампнинг аккаунти блокдан чиқарилганидан сўнг бир неча соат ичида 25 миллион обуначи йиғгани хабар берилганди.