Самарқандда Spark ҳайдовчиси ЙПХ ходимининг кўз ўнгида қарама-қарши йўлда ҳаракатлангани видео юзасидан маълумот берилди.

Ижтимоий тармоқларда Регистон майдони рўпарасида Spark русумли автомобиль ҳайдовчиси йўлнинг қарама-қарши ҳаракатланиш учун мўлжалланган томонига чиқиб ҳаракатлангани ва ушбу ҳудудда хизмат олиб бораётган ЙПХ ходимлари қоидабузар ҳайдовчини тўхтатиш чорасини кўрмагани акс этган видео тарқалди.

Мазкур видео жамоатчилик вакили томонидан «Ejarima.uz» дастурига юборилган бўлиб, масъул ходим томонидан қоидани бузган ҳайдовчига нисбатан Маъмурий жавобгарлик тўғрисидаги кодекснинг 128-5-моддаси иккинчи қисми тартибида БҲМнинг ўн баравари (3 миллион сўм) миқдорида жарима жазоси белгиланган.

Шунингдек, қоидабузарлик содир этилиши вақтида тегишли чора кўрилишини таъминламаган ходимларга нисбатан хизмат текшируви тайинланган.

Аввалроқ Тошкентда «мигалка» ўрнатилган Lacetti бир вақтнинг ўзида бир нечта қоидабузарликни содир этгани, Фарғонада қоидабузарлигини тасвирга олиб тарқатган ҳайдовчиларга чора кўрилгани, Сурхондарёда 50 дан ортиқ қоидабузарлик содир этган йигитга жавобгарликка тортилгани тўғрисида хабар берилганди.