Тошкентда жамоат транспортидан фойдаланиш даражасини ошириш мақсадида 23 ноябрдан янги автобус йўналиши ташкил этилди. Бу ҳақда пойтахт Транспорт бош бошқармаси матбуот хизмати хабар берди.

Қайд этилишича, янги экспресс автобус йўналиши Е-1-сонли ҳисобланиб, у ТТЗ—«Машинасозлар» метро бекати йўналиши бўйича қатновларни амалга оширади.

Автобус йўналиши ТТЗдан Юзработ, Гулсанам, Буюк Ипак Йўли, Мирзо Улуғбек, Тараққиёт 2-тор кўчалари орқали Машинасозлар метросига қадар ҳаракатланади.

Тўхташ бекатлари — ТТЗ бозори, Буюк Ипак йўли метроси, Шифокорлар малакасини ошириш институти, Ашхобод боғи.

Аввалроқ Тошкентда 143-сонли автобус йўналиши ўзгартиритилгани, пойтахтда яна 4 та янги автобус йўналиши ташкил этилгани тўғрисида хабар берилганди.