Шавкат Мирзиёев Навоий шаҳрида Халқ депутатлари вилоят кенгаши сессиясида иштирок этаётгани тўғрисида хабар берилганди. Президент матбуот котибининг маълум қилишича, сессияда Навоий вилоятига ҳоким тайинлаш бўйича ташкилий масала кўриб чиқилмоқда.

Президент вилоят фаолларининг билдирган фикрлари асосида Навоий вилояти ҳокими лавозимига ҳоким вазифасини бажариб келаётган Нормат Турсунов Тўлқунович номзодини тавсия этган.

Номзоднинг ҳудудни жадал ривожлантириш, аҳолига муносиб турмуш шароити яратиш, мавжуд муаммоларни ҳал этиш бўйича режаларини эшитиш таклиф қилинган.

Эслатиб ўтамиз, 2021 йил ноябрда Тошкент шаҳар солиқ бошқармаси раҳбари Навоийга ҳоким этиб тайинланганди.

Маълумот учун, Нормат Турсунов солиқ органлари тизимидаги фаолиятини 1994 йили Тошкент шаҳрининг ҳозирги Учтепа тумани давлат солиқ инспектори лавозимидан бошлаган. 2010–2017 йилларда у Жиззах вилояти давлат солиқ бошқармаси раисининг биринчи ўринбосари, сўнг Навоий вилояти давлат солиқ бошқармаси бошлиғи лавозимларида ишлаган. Нормат Турсунов ҳозирга қадар Тошкент шаҳар давлат солиқ бошқармаси бошлиғи лавозимида ишлаб келган.