Блогер Шаҳноза Соатова Bugun.uzʼга берган интервьюсида Ўзбекистонда аёлларга нисбатан зўравонликларнинг олдини олиш бўйича нима ишлар қилиш кераклиги ҳақида гапирди.

Унинг сўзларига кўра, зўравонлик бутун дунёда бор муаммо.

«Инсон шунақаки ожизга нисбатан кучини кўрсаткиси келади. Шунақа хатар ва уни тийиб туриш механизмлари бор. Буни бутун дунё ўйлаб топган, велосипедни қайта кашф қилмай, биз ҳам шу нарсаларни ўзимизда жорий қилишимиз керак. Охирги вақтларда ўзгариш бўлаяптику, лекин бутун дунёда ишлаётган механизмлар нимагадир бизда ишламаяпти. Нимага? Чунки бизда аёлларга нисбатан зўравонликда битта кучли одам, масалан, эркак ёки унинг оиласи зўравонлик қилмайди, бизда аёлларга бутун жамоатчилик фикри билвосита босим қилади.

Бу қандай усулда амалга ошади? Улар зўравонликни оқлашга, ёқлашга, қурбоннинг ўзини айблашга ҳаракат қилади. Мана шу стериотиплар зўравонликни авж олдиради. Одамларимиз ҳатто зўравонлик нималигини билмайди. Зўравонлик ичида яшаб, унинг қурбони бўлаётганини ёки зўравонлик қилаётганини ҳам тушунишмайди… Зўравонликда зўравондан бошқа айбдор йўқ. Сабабларини ўрганиш мумкин, мотивларини таҳлил қилиш мумкиндир, лекин зўравонлик фактида зўравонни қоралаш керак», — дейди Соатова.

Шунингдек, Адлия вазирлиги масъули Тошкентда қайнота ва куёв бир аёлни судраб, машинага миндириб олиб кетгани тасвирланган видеога нисбатан ҳам ўз фикрини билдириб ўтган.

«Аёлни судраб олиб кетишаётгани ҳақида. Муҳокамалар кетяпти, у аёл болаларини ташлаб кетган экан, ўзидан ҳам ўтган, дейишяпти. Биз у оиланинг шароитини, аёлни бундай қарор қабул қилишга нима мажбур қилганини билмаймиз. Биз аниқ биламизки — зўравонлик видеога тушган. Лекин шундай шароитда ҳам биз қурбонни айблаш, зўравонни ёқлаш йўлидан борарканмиз зўравонлик кучаяверади. Бу зўравонликдан ҳеч ким ҳимояланмаган, жумладан уни ёқлаётганлар ҳам.

Ҳозир ахборот жуда кенг тарқалаётган бир замонда яшаяпмиз. Энди зўравонлик фактини яшириб бўлмайди, энди бундай фактлар кўпаяди. Зўравонликни кўрган одамнинг қалби хиралашади ва одам ўзини ўша жамиятда бахтсиз ҳис қилади. Нимадандир норозиликлари ошаверади», — дея таъкидлайди Шаҳноза Соатова.